Songs
Song 5
God, Take Kea Me
Fo da main music guy, one David kine Song Fo God fo sing um wit flutes
1Eh! You Da One In Charge! Try lissen wat I goin tell.
Try tink how come I stay moan.
2I yell fo you help me, so lissen up!
You, you my king an my God.
You da one I stay pray to.
3Eh! You Da One In Charge! Morning time,
Try lissen wat I gotta tell.
Ery day morning time,
I make one lis a all da tings I like tell you,
An I tell you, den I wait.
4You da kine God dat no stay good inside
Wen peopo no do wat stay right.
You no let peopo dat do wass bad, stay wit you.
5Da kine peopo dat talk big
Dat dey da greates
No can stan in front you.
You hate all da peopo dat stay do
Bad kine stuff.
6Da guys dat bulai peopo,
You goin wipe dem out bumbye.
Da kine guys dat like go kill peopo,
O da ones dat nobody can trus,
Fo you, Da One In Charge, dey pilau.
7But me, I go inside yoa house,
Cuz you erytime stay tight wit yoa peopo.
I go down an show you choke respeck
Inside da Temple dat stay spesho fo you.
8Eh! You Da One In Charge!
Cuz you do da right ting erytime,
Show me da way fo go!
Cuz get plenny peopo dat stay agains me,
Make um fo me do eryting da way you like.
9 Dem guys, no can trus wat come outa dea mout.
Inside, dey ony like wipe out peopo.
Dey talk nice kine,
But ony fo bulai you.
You lissen wat dey tell,
Jalike you goin fall down
Inside one open grave an mahke.
10Eh God! You da judge!
So tell dem guys dat you gotta punish dem.
Da tings dey make plan fo do,
Make dose same tings wipe dem out.
Throw um out, cuz dey go agains you!
11But fo all da peopo dat go by you
Fo you hide dem from da peopo dat come agains dem,
Make dem stay good inside!
Dey goin yell all da time cuz dey stay real good inside!
You goin make shua nobody hurt dem.
Erybody dat get love an aloha fo you
Cuz dey know wat kine god you,
Make dem feel good inside cuz dey stay tight wit you!
12Eh! You Da One In Charge! Dis fo shua:
Anybody dat stay do da right ting,
You make um so eryting go good fo dem.
All aroun dem you make good tings happen
Jalike you put one shield aroun dem
Fo notting hurt dem.
Song 13
Pray Wen You Sore Inside
One David Kine Song Fo God fo da main music guy
1Eh! You Da One In Charge! You goin bag from me foeva, o wat?!
You goin stay huhu an look da odda way?!
2I gotta worry bout all dis stuff, o wat?!
An stay sad inside ery day?!
Da guys dat stay agains me,
Erytime dey goin win ova me, o wat?!
3Eh! You Da One In Charge! You my God!
Try look wass happening, an do someting fo me!
Make me come strong one mo time,
Cuz no good I jus mahke!
4No good da guys dat stay agains me
Talk big an tell, “Eh, we wen smash um good!”
No let dem guys pop off
An dance an sing cuz dey win.
5But me, I stay trus you, you know.
You goin stay tight wit me cuz I yoa guy.
Bumbye you goin get me outa trouble,
An I goin dance an sing.
6Eh! Da One In Charge, I goin sing to you,
Cuz you do plenny good tings fo me.
Song 23
Da One In Charge Take kea His Peopo
One David Kine Song Fo God
1Da One In Charge, he take kea me,
Jalike da sheep guy
Take kea his sheeps.
Az why I get eryting I need.
2 Jalike he bring me fo lay down
Wea da choice an sof grass stay,
An take me by da calm watta.
3He make me come strong
One mo time inside.
He take me on da bestes trail,
Fo erybody know wat kine god him.
4God, even if I go thru
One real dark valley
Wea can mahke dea,
I no goin come sked
Dat someting bad goin happen,
Cuz you stay wit me.
You carry one club
Fo get me outa trouble,
An one stick fo walk
Fo show me wea fo go.
An dat make me no worries
Cuz eryting goin be okay.
5You set up da tables
An put food on um in front me,
Fo da guys dat stay agains me
See wat you do fo me.
You put olive oil on top my head
Fo show you get aloha fo me.
You make shua my drinking cup
Stay full erytime.
6Fo shua, you goin do good tings fo me,
An stay tight wit me cuz I yoa guy,
Ery day I live.
An I goin live foeva
Da house wea you live,
Da One In Charge.
Song 32
How God Hemo Yoa Shame
One David Kine Song Fo Teach
1 You goin stay good inside
If God hemo yoa shame
Fo da stuff you wen do agains him,
An if God no hold agains you,
Da bad kine stuff you wen do.
2Eryting goin go good fo you
If Da One In Charge no tell
He gotta punish you,
An if you da kine guy
Dat no bulai notting inside.
3Had one time, I neva tell notting
Bout da bad tings I wen do,
Dat time, my body wen come all weak
An all day I ony stay moan real loud.
4Day time an nite time,
I get heavy kine presha from you.
All my powa stay suck outa me,
Jalike I all dry up, summa time.
5But den, I wen tell you fo real kine
Dat I wen do bad tings,
An I no try fo hide no moa
Wat I know was wrong fo me do.
I wen make up my mind,
Dat I goin tell Da One In Charge
All da tings I wen do agains you.
Cuz a dat, you wen let me go,
An hemo da shame
Fo da bad tings I wen do.
6Cuz a dat, I like tell dis:
All da peopo dat stay tight wit you,
Good dey pray to you
Erytime dey get trouble.
Jalike wen da big flood come down,
An no hit dem.
7You, you jalike one place
Wea I can hide from trouble.
You proteck me wen get hard time.
You put peopo aroun me
Dat yell plenny
Cuz dey stay good inside,
Cuz you wen get me outa trouble.
8Da One In Charge tell:
“I goin help you undastan
An show you da way you suppose to go.
I goin tell you wass da bestes ting fo you fo do,
Cuz I stay watch out fo you.
9No ack jalike da horse o da mule
Dat no undastan
Wea dey suppose to go,
You gotta use da bit an da bridle
Fo no let um run away.”
10Da peopo dat do bad kine stuff,
Dey goin suffa plenny.
But whoeva stay trus Da One In Charge,
God goin do all kine stuff
Fo show he stay tight wit dem!
11Eh! All you peopo dat get um right
Wit Da One In Charge,
Stay good inside,
Cuz you stay tight wit him!
All you guys dat get one good heart
Fo do da right ting,
Dance an sing,
Cuz you stay real good inside!
Song 63
Stay Tight Wit God
One David kine Song Fo God, from da time he stay inside da boonies Judah side
1Eh God! You da God fo me!
I stay look fo you.
Me, I go all out fo find you,
Jalike I go find watta wen I thirsty!
I desperate fo see you,
My body come weak,
Till I find you!
Jalike I stay one place
Wea no mo rain an erybody tired
Cuz no mo watta ova dea.
2An cuz dass how I feel,
I know I goin see you ova dea
Inside yoa house dat stay spesho fo you.
I like see how strong
An awesome you stay.
3You stay tight wit me cuz I yoa guy.
Mo betta I live lidat,
Den jus stay alive.
I goin tell
Dat you da bestes!
4Cuz a dat, I goin tell erybody
Dat you do good tings fo me
All da time I stay alive.
I goin put up my hands
Fo show you love an respeck
Cuz I know wat kine god you.
5Inside, I feel jalike I get eryting I like,
Jalike wen I eat da bestes kine grinds.
I goin yell cuz I feel good
An tell erybody dat you da bestes!
6Wen I lay down on top my bed,
I tink bout you.
I tink plenny how you stay.
7Cuz you da One dat stay help me.
Wen I know fo shua
Dat you take kea me,
Az jalike you put yoa wings ova me,
Az why I can sing an dance.
8Me, I stay tight wit you.
You hold me up so I no fall down.
9But da peopo dat stay look fo me
Fo make trouble an kill me,
I like fo dem go down
Deep inside da groun
Wea da mahke peopo stay.
10I like fo dem get kill wit swords
An da wild dogs
Share dea bodies fo grind.
11Da King, he goin stay real good inside
Cuz az how God stay.
Erybody dat make one strong promise
An tell God fo put kahuna on top dem
If dey no do wat dey promise fo do,
Dey goin tell dat God da bestes.
But erybody dat stay bulai peopo,
God goin shut um up.
Song 91
God Take Kea Us Guys
1Da God Dass Mo Importan
Den All Da Odda Gods,
He stay hide you
Inside his secret place.
Cuz he Da God Dat Get All Da Powa,
He let you stay wit him
Fo no mo notting hurt you.
2I tell dis bout Da One In Charge:
“Him, he jalike one strong wall
Dat no let notting hurt me.
He da God fo me.
I trus him.”
3Da One In Charge
Goin get you outa trouble.
He no goin let da trap catch you.
He no goin let da plague kill you.
4He goin make shua notting go afta you
Jalike da muddah bird
Hide da small bird unda her wing.
You can trus him!
Dass why he stay jalike one shield
O one wall fo proteck you.
5You, you no need come sked
Dat somebody goin attack you
Nite time,
O dat one arrow goin hit you
Day time.
6You no need tink, “Bumbye dark time,
Da plague goin kill me!
Bumbye noon time,
Some bad spirit goin wipe me out!”
7Notting bad goin happen to you,
No matta tousan peopo mahke
One side a you
An mo den ten tousan peopo
Da odda side.
8You ony gotta look,
An you goin see how God
Pay back da peopo dat do bad tings.
9You tell, “Eh! You Da One In Charge!
You jalike da safe place wea I hide
So notting goin hurt me!”
Da God Dass Mo Importan
Den All Da Odda Gods,
You live wit him fo proteck you.
10Cuz a dat, no goin get
Notting bad happen to you.
No mo notting bad
Goin come nea wea you live.
11 God, he goin tell
His angel messenja guys
Fo take kea you ery place you go.
12 Jalike dey goin pick you up
An carry you in dea hands
Fo yoa feets no goin get bus up
On da rocks.
13 You goin win ova eryting,
Jalike if you wen fight
Wit da young lions
O da poison snakes.
14Da One In Charge, dis wat he tell:
“Eh, dis guy get love an aloha fo me
An stay tight wit me,
An he my guy cuz he know
Who me fo real kine!
Dass why I goin get him outa trouble
An no let notting hurt him.
15Any time he get trouble,
He can yell to me Da One In Charge fo help him.
I goin lissen him, I goin be dea
Fo make shua notting hurt him,
An I goin make shua erybody know he importan.
16I goin make him stay good inside cuz he know he goin live long time,
He goin see my powa
Fo get my peopo outa trouble.”
Song 121
Da One In Charge Take Kea His Peopo
Song fo sing wen you go up to da Temple Fo God
1Erytime I look da mountains, I tink:
Who goin help me?
2Da One In Charge,
He da One dat goin help me,
Da One dat make da sky an da world.
3Da One In Charge, he take kea you,
Fo you no fall down.
He take kea you, an he no goin sleep.
4Eh! Da One In Charge,
He jalike da bodyguard fo da Israel peopo.
He no need sleep!
He stay awake all da time.
5Da One In Charge, he da One
Dat take kea you.
He stay right dea nea you,
Jalike he make shade
Fo da sun no bodda you.
6Day time, da sun no goin hurt you.
Nite time,
Da moon no goin hurt you too.
7Da One In Charge, he goin take kea you
Fo notting bad happen to you.
He no goin let you mahke.
8Da One In Charge goin take kea you
Ery place you go,
From now, an foevas.
Song 133
Az Good Wen All You Braddahs Stick Togedda
Song fo sing wen you go up to da Temple Fo God, one David kine song
1Good, you know,
Wen all da braddah guys
Stick togedda jalike dey one.
Dass goin make erybody
Feel real good inside.
2Wen erybody stick togedda
Jalike dey one,
Dass jalike wen somebody put oil
On top yoa head fo show aloha.
Az jalike da time Moses wen make
Aaron da firs Main Pries Guy,
An he pour da spesho kine olive oil
On top Aaron head,
An da oil drip down his beard
To da collar a da robe.
3Wen erybody stick togedda
Jalike dey one,
Make you feel real good.
Jalike wen dew go on da grass
Morning time
On top da hills aroun Jerusalem,
An jalike on top Mount Hermon.
Weneva peopo stick togedda lidat,
Da One In Charge make shua
Eryting go good fo dem,
An dey get da real kine life
To da max foeva!
Song 139
God Know Me An Take Kea Me
One David kine song fo God, fo da main music guy
1Good, you know,
Wen all da braddah guys
Stick togedda jalike dey one.
Dass goin make erybody
Feel real good inside.
2Wen erybody stick togedda
Jalike dey one,
Dass jalike wen somebody put oil
On top yoa head fo show aloha.
Az jalike da time Moses wen make
Aaron da firs Main Pries Guy,
An he pour da spesho kine olive oil
On top Aaron head,
An da oil drip down his beard
To da collar a da robe.
3Wen erybody stick togedda
Jalike dey one,
Make you feel real good.
Jalike wen dew go on da grass
Morning time
On top da hills aroun Jerusalem,
An jalike on top Mount Hermon.
Weneva peopo stick togedda lidat,
Da One In Charge make shua
Eryting go good fo dem,
An dey get da real kine life
To da max foeva!
Business Info
SND Productions Hawaii
Oahu, Hawai‘i
Email: [email protected]
Copyrights 2025 | SNDProductionsHawaii™ | Terms & Conditions