Matthew
Matthew 1
Jesus Ancesta Guys
1Dis book tell bout Jesus an his ancesta guys. He da Christ Guy, da Spesho Guy God Wen Sen. He from King David ohana, an David, he from Abraham ohana.
2Dis Jesus ohana lis. Get fourteen faddahs from Abraham to David: Abraham, he Isaac faddah. Isaac, he Jacob faddah. Jacob, he Judah faddah, an all Judah braddahs, he dea faddah too.
3Judah, he Perez an Zerah faddah, an Tamar, she dea muddah. Perez, he Hezron faddah. Hezron, he Ram faddah.
4Ram, he Aminadab faddah. Aminadab, he Nashon faddah. Nashon, he Salmon faddah.
5Salmon, he Boaz faddah, an Rahab, she Boaz muddah. Boaz, he Obed faddah, an Ruth, she Obed muddah. Obed, he Jesse faddah.
6An Jesse, he King David faddah.
Den had fourteen faddahs from David till dey come prisonas Babylon side: David, he Solomon faddah. An Solomon muddah Batsheba, befo dat she Uriah wife.
7Solomon, he Rehoboam faddah. Rehoboam, he Abijah faddah. Abijah, he Asa faddah.
8Asa, he Jehoshafat faddah. Jehoshafat, he Joram faddah. Joram, he Uzziah faddah.
9Uzziah, he Jotham faddah. Jotham, he Ahaz faddah. Ahaz, he Hezekiah faddah.
10Hezekiah, he Manasseh faddah. Manasseh, he Amos faddah. Amos, he Josiah faddah.
11Josiah, he Koniah faddah, an Koniah braddahs too. Was dat time wen da Babylon armies wen make prisonas all da Jew guys, an take um away Babylon side.
12Afta dey take um away Babylon side, had fourteen faddahs: Koniah, he Shealtiel faddah. Shealtiel, he Zerubbabel faddah.
13Zerubbabel, he Abiud faddah. Abiud, he Eliakim faddah. Eliakim, he Azor faddah.
14Azor, he Zadok faddah. Zadok, he Akim faddah. Akim, he Eliud faddah.
15Eliud, he Eleazar faddah. Eleazar, he Mattan faddah. Mattan, he Jacob faddah.
16Jacob, he Joseph faddah. An Joseph, he Mary husban. Mary born Jesus, da one dey call da Christ Guy, da Spesho Guy God Wen Sen.
17So, da lis fo da faddahs from Abraham till King David, get fourteen faddahs, one afta da odda, an from King David till dey come prisonas Babylon side, get fourteen faddahs, an from wen dey prisonas Babylon side till Jesus, da Christ Guy, get fourteen faddahs.
Jesus Born
18 Befo Mary born Jesus, da Spesho Guy God Wen Sen, dis happen. Mary, she make ready fo marry Joseph. But befo dey marry, da Good An Spesho Spirit make her get hapai.
19Joseph, da guy dat goin come her husban, he one guy dat do da right ting erytime, an he no like make her come shame in front da peopo. So he figga, “I no goin marry her, but I no goin tell nobody.”
20But wen he stay figga lidat, right den an dea, wen he stay dreaming, one angel messenja guy from Da One In Charge come by him. Da angel guy tell, “Eh Joseph! You from King David ohana. No sked take Mary fo come yoa wife, cuz she hapai from God Spirit dat stay good an spesho.
21She goin born one boy, an you goin name um Jesus, cuz he goin get his peopo outa da kine bad stuff dey do.”
22All dis happen jalike Isaiah wen tell, da guy dat talk fo God long time befo time,
23 “Lissen up! One young wahine
Who neva sleep wit nobody,
Goin get hapai.
She goin born one boy.
Dey goin name him Emmanuel.”
(“Emmanuel” mean, “God stay hea now wit us guys.”)
24Joseph wake up an he do wat da angel guy from Da One In Charge tell him fo do. He take Mary home, fo come his wife.
25But he neva sleep wit her befo she born her boy. An he name him Jesus.
Matthew 2
Da Smart Guys Dat Know Plenny Bout Da Stars
1Jesus, he born Betlehem town, Judea side. Herod, he da king dat time. An you know wat? Had dese smart guys dat know plenny bout da stars. Dey come Jerusalem town from one far place, from da east side. Dey tell,
2“Wea da boy dat born, da King fo da Jews? We wen spock one star come up da east side dat show dat he born awready, an we come hea fo go down in front him an show him plenny respeck.”
3Wen King Herod hear dat, he come all shook up an sked. All da peopo inside Jerusalem, dey all come shook up an sked too.
4Den Herod tell all da Main Pries guys an all da teacha guys dat teach da Rules From God to da peopo fo come by him. He tell, “Try tell me wea God Spesho Guy goin born.”
5Dey tell um, “He goin born Betlehem, Judea side. Cuz da guy Micah wen tell dis (he one guy dat talk fo God long time befo time):
6 “ ‘Eh! You Betlehem guys, ova dea Judah side!
All da leadas inside Judah
Tink Betlehem importan.
Cuz from dea goin come one leada.
He goin take kea God peopo,
Da Israel peopo.’ ”
7Den Herod tell da guys dat know plenny bout da stars fo come by him. Dey come, but dey neva tell nobody. He find out from dem wat time da star show up inside da sky.
8Den he sen um Betlehem. He tell, “Go! Look all ova da place till you find da boy. Den come back ova hea an tell me. Cuz I like go dea fo go down in front him an show him respeck too.”
9Afta dey hear wat da king tell um fo do, dey go. An you know wat? Da same star, da one dey see befo, wen dey stay da east side, dat star go in front dem, an stop right ova da place wea da boy stay.
10Dey spock da star, an dey feel real good inside.
11Dey go inside da house. Dey see da boy an his muddah Mary. Dey go down in front him an show him respeck. Den dey take out dea rich stuffs, an give um to Jesus. Dey give um gold, incense, an spesho kine myrrh perfume.
12Afta dat dey get one dream from God. He tell um, “You guys betta not go back by King Herod.” So dey go home one diffren way.
Dey Run Away Egypt Side
13Afta da guys dat know plenny bout da stars go home, you know wat? Had one angel guy from Da One In Charge come by Joseph, wen he stay dream. Da angel guy tell him, “Eh Joseph! Wake up! Take yoa boy an his muddah, an go run Egypt side. Stay ova dea till I tell you fo come back. King Herod, he goin look fo da boy fo kill um dass why.”
14Az why Joseph get up, an take his boy an Mary, an dat nite dey run Egypt side.
15 Dey stay dea till Herod mahke. Wen all dis happen, was jalike Hosea wen tell, da guy dat talk fo God long time befo time, “I tell my boy fo come outa Egypt.”
Herod Murda Da Boys
16King Herod, he find out dat da guys dat know plenny bout da stars trick him, an he come real wild. He sen his army guys an tell um, “Go inside Betlehem an all da odda place ova dea, an kill all da small boys.” Dey kill all da boys two year ol an mo younga. Herod figga dat time, cuz da guys dat know plenny bout da stars wen tell him wat time da star show up firs time.
17Dis happen jalike Jeremiah wen tell, da guy dat talk fo God long time befo time:
18 “Dey hear one voice from inside Ramah,
Rachel, she stay cry real hard,
She real sore inside,
An cry fo her kids,
She no like nobody come by her,
Cuz da kids mahke awready.”
Dey Come Back From Egypt Side
19Bumbye, King Herod mahke. One angel messenja guy from Da One In Charge come by Joseph wen he stay dream ova dea Egypt side. Da angel guy tell him,
20“Eh Joseph! Wake up! Take yoa boy an his muddah, an go Israel side. Da guys dat like kill da boy, stay mahke awready.”
21So den Joseph get up fo take Jesus an Mary an go back Israel side.
22But he hear dat Arkelaus come king Judea side afta his faddah Herod mahke. Joseph sked fo go ova dea. God tell him inside one dream, “You betta not go ova dea.” So he go Galilee side,
23an make house Nazaret town. Dis happen jalike da guys dat talk fo God long time befo time wen tell, “Dey goin call him ‘da Nazaret guy.’ ”
Matthew 3
John Da Baptiza Guy Teach Da Peopo
1Afta Jesus grow up, John Da Baptiza Guy show up inside da boonies Judea side fo teach da peopo.
2He tell, “You guys gotta come sorry fo all da kine bad stuff you stay do now, an no do um no moa. Cuz God in da sky stay King hea now.”
3Befo time, Isaiah, da guy dat talk fo God, talk bout John wen he tell dis:
“He goin talk real loud inside da boonies,
‘Eh! Make da road ready fo Da One In Charge!
Make da road strait fo him!’ ”
4 An you know, John, his clothes come from da camel hair. He make one rope outa ledda fo one belt. He eat grasshoppa, an he get honey from da bees.
5Had choke plenny peopo go by him ova dea from Jerusalem, from Judea, an from all ova from da Jordan Riva side.
6Dey stay tell dey sorry fo all da kine bad stuff dey wen do, an he baptize dem in da Jordan Riva.
7 Plenny Pharisee guys an Sadducee guys come fo him baptize dem too. He see um, an tell, “Eh you guys! You guys jalike one snake ohana! God had it wit all da bad kine stuff you do. He goin punish you guys fo dat. No way you guys goin get away!
8Jalike one fruit tree give same kine fruit, you guys gotta do da kine good stuff dat show you come sorry fo do all da kine bad stuff you stay do, an no do um no moa.
9Eh! No tink, ‘Jus cuz Abraham oua main faddah us guy no goin get punish!’ I stay tell you guys now, God can take dese rocks ova hea an make kids fo Abraham outa dem.
10Awready get one guy wit one ax, all ready fo cut da tree roots. All da trees dat no make good fruit, he goin cut um, an throw um inside da fire.
11“All you guys, I goin baptize you guys wit watta. Dat goin show dat you guys come sorry fo do all da kine bad stuff you stay do an no do um no moa. But afta me, goin come anodda guy. He get mo powa den me. An you know wat? I not even spesho enuff fo help him hemo his slippas. Da way he goin baptize you guys, jalike he goin baptize you guys wit da Good An Spesho Spirit fo take ova you, jalike he baptize you guys wit fire!
12Jalike he goin throw all da wheat fo let da wind blow all da no good parts from da wheat, an den he goin put dat wheat inside da storage place. Afta dat, he goin burn all da no good parts inside da fire dat no goin pio eva.”
John Baptize Jesus
13Dat time, Jesus come from Galilee side to da Jordan Riva wea John stay, fo John baptize him.
14But John tell Jesus, “How come you come by me? Me, I no can baptize you. Eh, I need fo you baptize me!”
15But Jesus tell, “Dass okay fo you baptize me, fo show we like do eryting da right way.”
So John tell, “Shoots, we go den.” An he baptize Jesus.
16Right afta John baptize Jesus, Jesus come out from da watta, an you know wat? Da sky rip open. Jesus spock God Spirit stay come down on top him. Look jalike one dove.
17An wow! Had one voice from da sky tell, “Dis my boy. I get love an aloha fo him fo real kine, an I stay good inside cuz a him!”
Matthew 4
Da Devil Satan Try Presha Jesus Fo Do Bad Kine Stuffs
1 Afta dat, God Spirit take Jesus to da boonies, fo da Devil try presha him fo make um do bad kine stuff. 2Forty day, forty nite, Jesus pray an he neva eat notting. Afta dat time he stay real hungry. 3So Satan go by him an presha him. He tell Jesus, “So, wat? You God Boy fo real kine? Den tell dese rocks hea fo come food.”
4 But Jesus tell, “Da Bible tell,
“ ‘No mo nobody dat can live ony wit food,
Gotta lissen eryting God tell,
Fo live fo real kine.’ ”
5Den da Devil take him to Jerusalem, da town dat stay spesho fo God, an make him go up da big towa on top da temple. 6Da Devil tell, “So, wat? You God Boy fo real kine? Kay den, go jump down dea, cuz da Bible tell,
“ ‘God goin tell his angel messenja guys fo take kea you.’
“Da Bible tell dis too:
“ ‘Dey goin pick you up an carry you in dea hands,
Fo yoa feets no get bus up on da rocks.’ ”
7 But Jesus tell, “Da Bible tell: ‘God, he Da One In Charge a you. So no try presha him fo make um show proof dat he God.’ ”
8Den da Devil take him up on top one big mountain, an show him all da diffren countries all ova da world, an how awesome dey stay. 9Da Devil tell um, “I give you all dis, if you go down an show me plenny respeck.”
10 Jesus tell him, “Beat it awready, Satan! Da Bible befo time tell,
“ ‘Gotta go down on yoa knees
An show plenny respeck to God, Da One In Charge,
An live an work ony fo him.’ ”
11Den da Devil go way from Jesus, an you know wat? Angel guys from Da One In Charge come an kokua Jesus.
Jesus Start Fo Teach Galilee Side
12 Dat time, Herod guys wen throw John Da Baptiza guy in prison. Jesus hear dat, an he go Galilee side. 13He go Nazaret town, an den go from dea, an make house inside Capernaum. Dass one town by da lake side, ova dea Zebulun an Naftali ohana land side. 14Dis happen jalike da guy Isaiah wen tell, da one dat talk fo God long time befo time:
15 *“Zebulun side, Naftali side,
On top da road to da lake, da odda side Jordan Riva,
Galilee side wea get diffren peopos dat donno God,
16Da peopo ova dea dat stay inside da dark,
Dey see one big light now.
An all da guys dat stay
In da dark place wea peopo goin mahke,
Da light come fo dem.”
17 Dass wen Jesus start fo teach da peopo. He tell, “You guys gotta come sorry fo all da kine bad stuff you stay do, an no do um no moa, cuz God in da sky stay King hea now.”
Jesus Tell Four Fishamen Fo Come Wit Him
18One time Jesus stay walk by Galilee Lake, an he spock two braddahs, Simon da guy dey call Peter, an his braddah Andrew. Dey stay throw net inside da watta, cuz dey fishamen. 19He tell um, “Eh, you guys! Go come be my guys! Da way you guys fish fo fish, I goin teach you guys how fo fish fo peopo!” 20Right den an dea, dey jus leave da nets an go wit him.
21He go from dea an he spock two odda braddahs, James an his braddah John. Zebedee, dea faddah. Dey inside da boat wit dea faddah, an dey stay fixing da nets. Jesus tell um fo come. 22Right den an dea da braddahs go way from da boat an dea faddah, an dey go wit Jesus.
Jesus Teach An Make Peopo Come Good
23 Den Jesus go all ova Galilee fo teach inside da Jew churches. He tell da peopo all da Good Kine Stuff bout how can get God fo dea king, an he make all da sick peopo come good from all kine sick. 24Erybody hear bout him, from dea all ova Syria side. Dey bring all da peopo wit all kine sick by him: erybody dat hurt, an suffa plenny, da peopo dat get bad spirits dat take ova dem, peopo dat shake an roll all ova, an peopo dat no can move. An Jesus make um all come good. 25Plenny peopo go wit him from Galilee side, from all da Ten Towns, from Jerusalem, from Judea, an from da odda side a da Jordan Riva.